ផ្សាយព័ត៌មានផ្ទាល់
នៅថ្ងៃស្អែក ទី២៥ ខែវិច្ឆិកា ឆ្នាំ២០១៤ អ្នកការពារសិទិ្ធមនុស្សដែលល្បីឈ្មោះ ព្រះតេជគុណ លួន សុវាត នឹងត្រូវចូលខ្លួនក្នុងសវនាការរបស់សាលាដំបូងរាជធានីភ្នំពេញ ដែលពោពេញដោយកំហុស និងការពន្យាពេលនៃនីតិវិធី ក្នុងគោលដៅបំបិទសម្លេងរបស់ព្រះអង្គ។ ព្រះអង្គ ត្រូវបានចោទប្រកាន់ពីបទ ញុះញង់ឲ្យប្រព្រឹត្តិបទឧក្រិដ្ឋ ទាំងនៅក្នុងប្រទេសកម្ពុជា និងនៅបរទេស សម្រាប់ការអះអាងថាបានញុះញង់ និងដឹកនាំបាតុកម្មប្រឆាំងនឹងអាជ្ញាធររដ្ឋ ដែលត្រូវបានធ្វើឡើងដោយជនរងគ្រោះដីធ្លីនៅជីក្រែង ខេត្តសៀមរាប និងនៅតំបន់បឹងកក់ រាជធានីភ្នំពេញ។ ប្រសិនបើព្រះអង្គត្រូវបានគេផ្តន្ទាទោស ព្រះអង្គនឹងត្រូវជាប់ពន្ធនាគារចំនួន ២ឆ្នាំ និងពិន័យជាប្រាក់ ១០០០ ដុល្លារ ដែលស្មើនឹងជាង ៤.០០០.០០០ រៀល។
ព្រះតេជគុណ គឺត្រូវបានគេទទួលស្គាល់ជាអន្តរជាតិថាជា "ព្រះសង្ឃពហុប្រព័ន្ធផ្សព្វផ្សាយព័ត៌មាន" ហើយការខិតខំប្រឹងប្រែងរបស់ព្រះអង្គ ដើម្បីបន្លឺសម្លេងអំពីការរំលោភសិទិ្ធមនុស្សទៅលើសហគមន៍ងាយរងគ្រោះ និងអ្នកការពារសិទ្ធិមនុស្សនៅក្នុងប្រទេសកម្ពុជា ត្រូវបានគេទទួលស្គាល់ទូទាំងពិភពលោកដោយអង្គការសហប្រជាជាតិ និងអ្នកនយោបាយនានា ហើយនិងអង្គការមិនមែនរដ្ឋាភិបាលអន្តរជាតិនានា។
កែប្រែ ១៦:០៥ ICT
"មូលហេតុនៃការវិវឌ្ឍន៍"៖ ព្រះតេជគុណ លួន សុវាត
ប្រសិនបើយើងនៅជិតការភ័យខ្លាច នោះយើងនឹងមានភាពក្លាហាន។ ប៉ុន្តែប្រសិនបើយើងនៅឆ្ងាយពីបញ្ហារបស់យើង នោះបញ្ហាទាំងនោះនឹងរត់មករកយើង។
ខាងក្រោមនេះ គឺជាវីដេអូខ្លីមួយបានមកពីវីដេអូឯកសារដែលមានចំណងជើងថា៖ "The Cause of Progress" ឬ "មូលហេតុនៃការវិវឌ្ឍន៍" ដែលផលិតដោយផលិតករ Chris Kelly។ វីដេអូឯកសារនេះ បង្ហាញពីដំណើររបស់ព្រះតេជគុណ លួន សុវាត ដើម្បីក្លាយជាអ្នកការពារសិទ្ធិមនុស្សដែលត្រូវបានគេទទួលស្គាល់ជាអន្តរជាតិ។
កែប្រែ ១៦:៣៧ ICT
រូបភាពពីអង្គការ វីតណេស (WITNESS)
នៅឆ្នាំ ២០១០ ព្រះតេជគុណ លួន សុវាត ត្រូវបានទទួលស្គាល់ដោយការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (UNOHCHR) នៅក្នុងវីដេអូអ្នកការពារសិទិ្ធមនុស្សឆ្នាំ ២០១០ របស់ខ្លួន ហើយទទួលបានពានរង្វាន់ “See it. Film it. Change it.” ពីអង្គការសិទិ្ធមនុស្សអន្តរជាតិ វីតណេស (WITNESS)។ មិនដល់មួយឆ្នាំក្រោយមក ព្រះអង្គ បានទទួលពានរង្វាន់ Hellman/Hammettប្រកបដោយកិត្តិនាម ពីអង្គការ Human Rights Watch សម្រាប់ការខំប្រឹងប្រែងរបស់ព្រះអង្គ ក្នុងការគាំទ្រសហគមន៍មួយចំនួនដែលទទួលរងការបណ្តេញចេញដោយបង្ខំ និងការរំលោភដីធ្លីនៅក្នុងប្រទេសកម្ពុជា។
គួរឲ្យកត់សម្គាល់បំផុតនោះគឺ ព្រះអង្គ បានទទួលពានរង្វាន់ Martin Ennals ឆ្នាំ២០១២ សម្រាប់អ្នកការពារសិទិ្ធមនុស្សកាលពីថ្ងៃទី២ ខែតុលា ឆ្នាំ២០១២ ដោយបានក្លាយជាប្រជាពលរដ្ឋកម្ពុជាទីមួយក្នុងការទទួលបានពានរង្វាន់នេះ។ ពានរង្វាន់នេះ ដែលត្រូវបានទទួលស្គាល់ដោយមនុស្សជាច្រើនថាជា “ពានរង្វាន់ណូបែលសម្រាប់អ្នកការពារសិទិ្ធមនុស្ស” ត្រូវបានបង្កើតឡើងនៅឆ្នាំ ១៩៩៣ ដើម្បីផ្តល់កិត្តិយស និងការពារបុគ្គលដែលមានសេចក្តីក្លាហានលើសមនុស្សធម្មតា ក្នុងការការពារ និងលើកកំពស់សិទិ្ធមនុស្ស។
នេះគឺការបញ្ចប់ការផ្សាយផ្ទាល់នារសៀលនេះ។ សូមរង់ចាំតាមដានការផ្សាយព័ត៌មានផ្ទាល់របស់យើងខ្ញុំនៅថ្ងៃស្អែក។
កែប្រែ ១៧:២៧ ICT
អរុណសួស្តី! ឥឡូវនេះព្រះតេជគុណ លួន សុវាត កំពុងនៅតាមផ្លូវទៅកាន់សាលាដំបូងរាជធានីភ្នំពេញ។
អ្នកគាំទ្រមកពីស្រុកជីក្រែង និងបន្ទាយស្រី នៅខេត្តសៀមរាប និងតំបន់បឹងកក់ រាជធានីភ្នំពេញ កំពុងប្រមូលផ្តុំគ្នា និងធ្វើដំណើរមកកាន់សាលាដំបូងរាជធានីភ្នំពេញ ដោយរួមមានវត្តមានតំណាងរាស្ត្រគណបក្សសង្គ្រោះជាតិ លោកស្រី មួរ សុខហួរ ផងដែរ។ រថយន្តនគរបាលចំនួន ៣គ្រឿង កំពុងឈប់នៅក្នុងពហុកីឡាដ្ឋានជាតិ អូឡាំពិក នៅខណៈដែលអ្នកគាំទ្រប្រមាណ ១០០ ទៅ ១៥០ នាក់ បានមកដល់។
ព្រះតេជគុណ លួន សុវាត កំពុងផ្តល់បទសម្ភាសន៍ដល់សារព័ត៌មាននៅក្រៅតុលាការ ដោយឈរក្បែរអ្នកគាំទ្រប្រមាណ ១៥០ នាក់ ដែលបានធ្វើដំណើរពីសហគមន៍របស់អ្នកទាំងនោះ ដែលរួមមានមកពី៖
- ខេត្តសៀមរាប
- ខេត្តកំពង់ឆ្នាំង
- ខេត្តកំពង់ធំ
- ខេត្តព្រះវិហារ
- រាជធានីភ្នំពេញ
កែប្រែ ០៨:០៧ ICT
ព្រះតេជគុណ លួន សុវាត កំពុងបក់ដៃមករកអ្នកគាំទ្ររបស់ព្រះអង្គ ពីក្នុងតុលាការ នៅពេលព្រះអង្គកំពុងរង់ចាំសវនាការរបស់ព្រះអង្គចាប់ផ្តើម។
សវនាការរបស់ព្រះតេជគុណ លួន សុវាត បានទាញចំណាប់អារម្មណ៍ពីសហគមន៍អន្តរជាតិ ក៏ដូចជាអ្នកតំណាងមកពីការិយាល័យឧត្តមស្នងការអង្គការសហប្រជាជាតិទទួលបន្ទុកសិទិ្ធមនុស្ស (OHCHR) ហើយនិងស្ថានទូតបរទេសនានា ដូចជាស្ថានទូតស៊ុយអែត អាល្លឺម៉ង់ ស្វីតសែឡែន និងសហគមន៍អឺរ៉ុប ឲ្យមកអង្គុយស្តាប់ក្នុងសវនាការ។ អង្គការមិនមែនរដ្ឋាភិបាលអន្តរជាតិរបស់ជំនួយព្រះវិហារដាណឺម៉ាក (DanChurchAid) និងអង្គការលើកលែងទោសអន្តរជាតិ ក៏មានវត្តមានផងដែរ។
នាយកផ្នែកស្រាវជ្រាវសម្រាប់តំបន់អាស៊ីអាគ្នេយ៍ និងបាស៊ីហ្វិក នៃអង្គការលើកលែងទោសអន្តរជាតិ លោក Rupert Abbott បានបង្ហោះក្នុងបណ្តាញទំនាក់ទំនងសង្គម Twitter របស់លោកថា៖ "នៅសាលាដំបូងរាជធានីភ្នំពេញឥឡូវនេះ ដើម្បីបង្ហាញការគាំទ្រដល់ព្រះតេជគុណ លួន សុវាត។ សហគមន៍របស់ព្រះអង្គកំពុងរង់ចាំនៅខាងក្រៅ។"
At Phnom Penh Municipal Court to show @AmnestyOnline's support for Venerable @SOVATH_HRD. His community waits outside pic.twitter.com/9oEeykPXJ2
— Rupert Abbott (@RupertBAbbott) November 25, 2014នីតិវិធីតុលាការកំពុងដំណើរការ
នីតិវិធីតុលាការកំពុងដំណើរការ នៅខណៈដែលអ្នកគាំទ្រព្រះអង្គនៅខាងក្រៅតុលាការមានប្រមាណ ២០០ នាក់ ឥឡូវនេះ។
កែប្រែ ១០:២១ ICT
មានព្រះសង្ឃប្រមាណ ៤០ អង្គ កំពុងចូលរួមឈរនៅក្រៅតុលាការ។
ព្រះសង្ឃ កំពុងសូត្រមន្តនៅក្រៅតុលាការ ដើម្បីគាំទ្រព្រះតេជគុណ លួន សុវាត។
តុលាការ កំពុងស្នើឲ្យសមាជិកនៅក្នុងសាលសវនាការ ចុះបញ្ជីវត្តមានដើម្បីរាប់ចំនួនមនុស្សដែលមានវត្តមាននៅក្នុងតុលាការ។ នេះជាលើកទីមួយ ដែលអង្គការ លីកាដូ បានឃើញដោយផ្ទាល់ចំពោះការស្នើសុំសាធារណជនដែលចូលរួមឲ្យកត់វត្តមាន នៅក្នុងសវនាការជាសាធារណៈ។ សាធារណជនមួយចំនួន បដិសេធក្នុងការចុះឈ្មោះរបស់អ្នកទាំងនោះ រួមមានមន្ត្រីស្ថានទូតមួយចំនួន។
សូមស្វាគមន៍មកកាន់មជ្ឈមណ្ឌលផ្សាយ ព័ត៌មានអំពីព្រឹត្តិការណ៍នយោបាយ និងសិទិ្ធមនុស្សសំខាន់ៗ នៅក្នុងប្រទេសកម្ពុជា របស់យើងខ្ញុំ ។
នៅខណៈដែលស្ថានភាពត្រូវបានបង្ហាញ យើងនឹងផ្តល់នូវព័ត៌មានទាន់ហេតុការណ៍ពីទីតាំងផ្ទាល់ ពីអ្នកឃ្លាំមើលរបស់យើងខ្ញុំ និងប្រភពព័ត៌មានដែលអាចជឿទុកចិត្តបានដទៃទៀត ដូចជាអ្នកកាសែត និងដៃគូអង្គការមិនមែនរដ្ឋាភិបាលនានា។
LICADHO Website
Facebook
Twitter