ផ្សាយព័ត៌មានផ្ទាល់៖ ទិវាសិទិ្ធមនុស្សអន្តរជាតិ ២០១៤

១៥:២២ ICT ថ្ងៃ៩ ខែធ្នូ

ការដើរហែក្បួន និងព្រឹត្តិការណ៍ដែលគ្រោងធ្វើសម្រាប់ស្អែក

ចុចលើផែនទីខាងលើដើម្បីពង្រីកទីតាំង។ ព្រឹត្តិការណ៍ដែលបានគ្រោងភាគច្រើន មិនត្រូវបានអនុញ្ញាតដោយសាលារាជធានីភ្នំពេញទេ ហើយដូចនេះអាចនឹងត្រូវបានផ្លាស់ប្តូរ

ចាប់តាំងពីថ្ងៃទី៥ ក្បួនធម្មយាត្រា-សិទិ្ធយាត្រា ត្រូវបានធ្វើឡើងនៅលើផ្លូវជាតិចំនួន ៧ ទូទាំងប្រទេសកម្ពុជា។ ក្រុមដើរហែក្បួន គឺត្រូវបានដឹកនាំដោយព្រះសង្ឃ ហើយសមាជិករួមមានសហគមន៍ជនជាតិដើមភាគតិច យុវជន ប្រជាពលរដ្ឋរងគ្រោះដោយជម្លោះដីធ្លី និងអង្គការមិនមែនរដ្ឋាភិបាលនានា។ នៅពេលដែលអ្នកទាំងនោះមកដល់រាជធានីភ្នំពេញ រួមបញ្ចូលគ្នាពួកគេនឹងដើរបានចង្ងាយជាង ៦០០ គ.ម។

នៅព្រឹកនេះ អ្នកដើរហែក្បួន មិនត្រូវបានអនុញ្ញាតឲ្យដើរចូលមកកាន់រាជធានីនោះទេ ដោយមានការបិទផ្លូវពីកងសន្តិសុខជាច្រើននៅតាមផ្លូវជាតិទាំង ៦។ បន្ទាប់ពីរង់ចាំ និងចរចាអស់ជាច្រើនម៉ោង ក្រោមកំដៅថ្ងៃ ក្រុមទាំងអស់ត្រូវបានអនុញ្ញាតឲ្យបន្តក្បួន។

អ្នកដើរហែក្បួន ឥឡូវបានមកដល់កន្លែងសម្រាកចុងក្រោយរបស់អ្នកទាំងនោះហើយ ហើយក៏ជាទីតាំងសម្រាប់ពួកគេចាប់ផ្តើមដើរហែក្បួននៅថ្ងៃស្អែកទៅកាន់វិមានរដ្ឋសភាជាតិ៖

ផ្លូវជាតិលេខ ១៖ វត្តច្បារអំពៅ នៅខណ្ឌច្បារអំពៅ
ផ្លូវជាតិលេខ ២៖ វត្តថាន់ នៅខណ្ឌច្បារមន
ផ្លូវជាតិលេខ ៣៖ មជ្ឈមណ្ឌលអប់រំច្បាប់សម្រាប់សហគមន៍ នៅខណ្ឌដង្កោរ
ផ្លូវជាតិលេខ ៤៖ វត្តស្ទឹងមានជ័យ នៅខណ្ឌមានជ័យ
ផ្លូវជាតិលេខ ៥៖ វត្តឧត្តរាវត្តី (វត្តប្ញស្សីកែវ) នៅខណ្ឌប្ញស្សីកែវ
ផ្លូវជាតិលេខ ៦៖ វត្តគៀនឃ្លាំង នៅខណ្ឌជ្រោយចង្វារ

បន្ថែមលើការដើរហែក្បួន ព្រឹត្តិការណ៍ខាងក្រោមទាំងនេះ ក៏នឹងត្រូវបានគ្រោងធ្វើឡើងនាថ្ងៃស្អែកផងដែរ។

សមាជិកសហជីពជាង ៣០០០ នាក់ មកពីសហជីពការងារកម្ពុជា (CLC) នឹងប្រមូលផ្តុំគ្នានៅទីលានប្រជាធិបតេយ្យ ហើយនិងមានការថ្លែងសុន្ទរកថាដើម្បីប្រារព្ធទិវាសិទិ្ធមនុស្សអន្តរជាតិ។ បន្ទាប់មកកម្មករនឹងដើរហែក្បួនទៅកាន់រដ្ឋសភាជាតិ ដើម្បីដាក់ញត្តិ។
គណៈកម្មាធិការប្រព្រឹត្តិកម្មនៃអង្គការ-សមាគមការពារសិទិ្ធកម្ពុជា បានអញ្ជើញអង្គការ និងអ្នកចូលរួមជាច្រើន ដើម្បីប្រមូលផ្តុំគ្នានៅមុខក្រុមប្រឹក្សាអភិវឌ្ឍន៍កម្ពុជា មុនពេលដើរទៅកាន់ទីលានប្រជាធិបតេយ្យ ហើយធ្វើការថ្លែងសុន្ទរកថានៅលើឆាកនៅទីនោះ។
អាជ្ញាធររាជធានីភ្នំពេញ នឹងប្រារព្ធទិវានេះនៅសាលកោះពេជ្យ។ យោងតាមការផ្សាយជាសាធារណៈ ព្រឹត្តិការណ៍នេះនឹងផ្តោតលើការអភិវឌ្ឍន៍ទីក្រុង និងសិទិ្ធរបស់សហគមន៍ក្រីក្រនៅទីប្រជុំជន។
ចាប់ពីម៉ោង ៤ល្ងាច ទៅម៉ោង ៨ កន្លះ ល្ងាច ចលនាយុវជនគណបក្សសង្គ្រោះជាតិ នឹងប្រមូលផ្តុំគ្នា នៅសួនទន្លសាបនៅមុខអាគារក្រុមប្រឹក្សាអភិវឌ្ឍន៍កម្ពុជា។ នៅទីនោះនឹងមានការប្រគុំតន្ត្រី និងសុន្ទរកថាដោយមេដឹកនាំគណបក្សសង្គ្រោះជាតិ គឺប្រធាន ឯកឧត្តម សម រង្ស៊ី និងអនុប្រធាន ឯកឧត្តម កឹម សុខា។

កែប្រែ ១៥:៣៥ ICT

១៦:៣០ ICT ថ្ងៃ៩ ខែធ្នូ

ក្រុមជនជាតិដើមភាគតិចប្រារព្ធទិវាសិទិ្ធមនុស្សអន្តរជាតិឆ្នាំ ២០១៤

ទិវាសិទិ្ធមនុស្សអន្តរជាតិនាឆ្នាំនេះ ក្បួនក៏ត្រូវបានប្រារព្ធនៅខេត្តរតនគិរីផងដែរ។ នេះជាលើកទីមួយ ដែលទិវានេះក៏ត្រូវបានប្រារព្ធនៅទីនោះ។ អ្នកដើរហែក្បួនចំនួន ២០០នាក់ ដែលក្នុងនោះរួមមានអ្នកចូលរួម ១០០នាក់ មកពីភូមិជនជាតិដើមទំពួន គួយ គ្រឿង ប្រាវ ចារាយ ខាចក់ និងខ្មែរលើ បានប្រារព្ធទិវានៅក្នុងខេត្តរតនគិរី មុនពេលមកចូលរួមជាមួយអ្នកដើរហែក្បួននៅផ្លូវជាតិលេខ ៦ នៅថ្ងៃទី៥ ខែធ្នូ។

អ្នកដើរហែក្បួន បានប្រមូលផ្តុំគ្នានៅភូមិ ល្អៀនក្រែន ឃុំ អូរជុំ ស្រុក អូរជុំ ខេត្តរតនគិរី ជាកន្លែងដែលកម្មវិធីដូចជាការផ្តល់ពុទ្ធឱវាទអំពីព្រះពុទ្ធសាសនា និងសិទិ្ធមនុស្ស និងទិវាសិទិ្ធមនុស្សអន្តរជាតិ (IHRD) ការបញ្ចាំងវីដេអូអំពីការដើរហែក្បួនកាលពីឆ្នាំមុន និងវីដេអូខ្លីស្តីពីសិទិ្ធកុមារ។ មេដឹកនាំជនជាតិភាគតិច បាននិយាយអំពីសិទិ្ធជនជាតិដើមភាគតិច ហើយសហគមន៍ជនជាតិទំពួនបានសំដែងរបាំប្រពៃណីរបស់ពួកគេ។

អ្នកទាំងនោះ ក៏ប្រារព្ធនូវវេទិកាសាធារណៈនៅបឹងយក្សឡោម នៅថ្ងៃទី៤ ខែធ្នូ ជាកន្លែងស័ក្តសិទិ្ធសម្រាប់ជនជាតិទំពួន និងជាកន្លែងដែលព្រះតេជគុណ លួនសុវាត និងព្រះសង្ឃដទៃទៀតធ្វើបទបង្ហាញទៅកាន់អ្នកដើរហែក្បួន។

អ្នកដើរហែក្បួនបានជួបបញ្ហានៅថ្ងៃទី៤ នៅវត្តគិរីសោភ័ណ ភូមិផៃ ឃុំត្រពាំងច្រះត្រពាំងក្រហម ស្រុកកូនមុំ នៅពេលដែលកងរាជអាវុធហត្ថ និងនគរបាលចំនួន ២០នាក់ មិនអនុញ្ញាតឲ្យស្នាក់នៅទីនោះ។ ទោះជាអ្នកដើរហែក្បួនមានលិខិតអនុញ្ញាតពីអាជ្ញាធរខេត្តក៏ដោយ ក៏អភិបាលស្រុកកូនមុំ អភិបាលរងខេត្តរតនគិរី និងអធិការងខេត្ត បានប្រាប់អ្នកដើរហែក្បួនថាពួកគេអាចស្នាក់នៅទីវាលតាមផ្លូវជាតិលេខ ៧បាន។ ក្រុមអ្នកដើរហែក្បួន ក៏សម្រេចចិត្តធ្វើដំណើរទៅខេត្តស្ទឹងត្រែង ដើម្បីស្នាក់នៅមួយយប់ មុនពេលឆ្ពោះទៅផ្លូវជាតិលេខ ៦ នៅថ្ងៃស្អែក។

កែប្រែ ១៦:៣០ ICT

១៦:៣៥ ICT ថ្ងៃ៩ ខែធ្នូ

អ្នកដើរហែក្បួននៅផ្លូវជាតិលេខ ៣ ទើបតែបានមកដល់នៅមជ្ឈមណ្ឌលអប់រំច្បាប់សម្រាប់សហគមន៍ (CLEC) នៅខណ្ឌដង្កោ។ អ្នកទាំងនោះនឹងស្នាក់នៅមួយយប់មុនពេលជួបជុំគ្នាជាមួយអ្នកដើរហែក្បួនផ្លូវដទៃទៀតនៅមុខរដ្ឋសភាជាតិថ្ងៃស្អែក។

អ្នកដើរហែក្បួនពីផ្លូវជាតិលេខ ២ ជាក្រុមដំបូងគេដែលបានមកដល់កន្លែងស្នាក់នៅ គឺវត្តថាន់ នៅខណ្ឌចំការមន នៅម៉ោង ៣ល្ងាច។ ក្រុមដើរក្បួនផ្លូវជាតិលេខ ១ ៤ ៥ និង៦ កំពុងធ្វើដំណើរមកកាន់រាជធានីភ្នំពេញ។

១៦:៤២ ICT ថ្ងៃ៩ ខែធ្នូ

អ្នកដើរហែក្បួន មិនត្រូវបានអនុញ្ញាតឲ្យចូលក្នុងវត្តនៅរាជធានីភ្នំពេញ

នៅផ្លូវជាតិលេខ ៦ អ្នកដើរហែក្បួនបានមកដល់ក្លោងទ្វារវត្តគៀនឃ្លាំង នៅខណ្ឌជ្រោយចង្វារ។ ប៉ុន្តែវត្តមិនអនុញ្ញាតឲ្យអ្នកទាំងនោះស្នាក់នៅនោះទេ។

នៅផ្លូវជាតិលេខ ៥ អ្នកដឹកនាំក្បួន បានប្រកាសថាវត្តឧត្តរាវត្តី (វត្តប្ញស្សីកែវ) នៅខណ្ឌប្ញស្សីកែវ កំពុងមិនអនុញ្ញាតឲ្យអ្នកដើរហែក្បួនស្នាក់នៅមួយយប់។ នគរបាលប្រហែល ១០នាក់ កំពុងឈរនៅក្លោងទ្វារវត្ត។

អ្នកដើរហែក្បួន បានជួបប្រទះបញ្ហានូវការចូលក្នុងវត្តដើម្បីស្នាក់នៅ ចាប់តាំងពីចាប់ផ្តើមហែក្បួននោថ្ងៃទី៤ ដោយធ្វើឲ្យព្រះសង្ឃ និងអ្នកដើរហែក្បួនមួយចំនួនគ្មានជម្រកស្នាក់នៅពេលយប់។

កែប្រែ ១៦:៤៣ ICT

១៦:៥០ ICT ថ្ងៃ៩ ខែធ្នូ

នៅផ្លូវជាតិលេខ ១ អ្នកដើរហែក្បួន បានសម្រេចចិត្តផ្លាស់ប្តូរគម្រោង និងស្នាក់នៅនៅក្នុងវត្តនិរោធ នៅខណ្ឌច្បារអំពៅ។

នៅ ផ្លូវជាតិលេខ ៦ អ្នកដើរហែក្បួន មិនត្រូវបានអនុញ្ញាតឲ្យចូលវត្តគៀនឃ្លាំងនោះទេ ឥឡូវនេះអ្នកទាំងនោះបានធ្វើដំណើរទៅវត្តចាស់ ដែលជាវត្តធ្លាប់ផ្តល់ទីជម្រកដល់សកម្មជនដីធ្លីមកពីខេត្ត។

១៧:០៤ ICT ថ្ងៃ៩ ខែធ្នូ

ក្លោងទ្វាវត្តស្ទឹងមានជ័យបានចាក់សោរ

អ្នកដើរហែក្បួនតាមផ្លូវជាតិលេខ ៤ បានមកដល់វត្តស្ទឹងមានជ័យ ខណ្ឌមានជ័យហើយ ប៉ុន្តែក្លោងទ្វារត្រូវបានចាក់សោរ។ អ្នកដើរហែក្បួន បានឈប់នៅមុខក្លោងទ្វារ ហើយនិយាយស្នើសុំឲ្យបើកក្លោងទ្វារ។ ព្រះចៅអធិការវត្តបាននិយាយថា ទ្វារត្រូវបានចាក់សោរដោយអាជ្ញាធរសង្កាត់ស្ទឹងមានជ័យ។

នៅផ្លូវជាតិលេខ ៥ អ្នកដើរហែក្បួន ឥឡូវត្រូវបានអនុញ្ញាតឲ្យស្នាក់នៅមួយយប់នៅវត្ត ឧត្តរាវត្តី (វត្តប្ញស្សីកែវ) បន្ទាប់ពីចរចាជាមួយអាជ្ញាធរមូលដ្ឋាន។

កែប្រែ ១៧:១៥ ICT

១៧:៤០ ICT ថ្ងៃ៩ ខែធ្នូ

គណៈកម្មាធិការប្រព្រឹត្តិកម្មនៃអង្គការ-សមាគមការពារសិទិ្ធកម្ពុជា (CHRAC) បានបង្ហោះកាលវិភាគនៃព្រឹត្តិការណ៍ ដែលខ្លួនបានរៀបចំសម្រាប់ស្អែក៖

Post by Chrac Human Rights.

សុន្ទរកថាសំខាន់ៗ នឹងត្រូវបានធ្វើឡើងនៅទីលានប្រជាធិបតេយ្យ ដោយមានអ្នកដឹកនាំសហជីព និងសហគមន៍មូលដ្ឋាន ក៏ដូចជាអ្នកស្រី Wan-Hea Lee ប្រមុខការិយាល័យអង្គការសហប្រជាជាតិទទួលបន្ទុកសិទិ្ធមនុស្សនៅកម្ពុជា និងលោក Jean-Francois Cautain អគ្គរដ្ឋទូតសហភាពអឺរ៉ុប។

តំណាងរាស្រ្តជាប់ឆ្នោតអ្នកស្រី មួរសុខហួរ បានបង្ហោះកាលវិភាគកម្មវិធីរបស់គណបក្សសង្គ្រោះជាតិនៅគេហទំព័រ Facebook របស់អ្នកស្រី៖

Post by Mu Sochua.

១៧:៤៧ ICT ថ្ងៃ៩ ខែធ្នូ

ដោយមិនត្រូវបានអនុញ្ញាតឲ្យចូលដ្នាក់នៅក្នុងវត្តស្ទឹងមានជ័យ អ្នកដើរហែក្បួនឥឡូវកំពុងធ្វើដំណើរទៅកាន់វត្តសាមគ្គីរង្សី។ អ្នកដើរហែក្បួននៅតាមផ្លូវដទៃទៀតបានចូលស្នាក់នៅទៅតាមគោលដៅរៀងៗខ្លួនខាងក្រោម៖

ផ្លូវជាតិលេខ ១៖ វត្តនិរោធ នៅខណ្ឌច្បារអំពៅ
ផ្លូវជាតិលេខ ២៖ វត្តថាន់ នៅខណ្ឌចំការមន
ផ្លូវជាំតិលេខ ៣៖ មជ្ឈមណ្ឌលអប់រំច្បាប់សម្រាប់សហគមន៍ នៅខណ្ឌដង្កោរ
ផ្លូវជាតិលេខ ៥៖ វត្តឧត្តរាវត្តី នៅខណ្ឌប្ញស្សីកែវ
ផ្លូវជាតិលេខ ៦៖ វត្តចាស់ នៅខណ្ឌជ្រោយចង្វារ

នេះជាចុងបញ្ចប់នៃការផ្សាយព័ត៌មានផ្ទាល់នាល្ងាចនេះ។ សូមតាមដានការផ្សាយព័ត៌មានផ្ទាល់ជាមួយយើងខ្ញុំបន្តទៀតនាថ្ងៃស្អែក។

០៧:១០ ICT ថ្ងៃ១០ ខែធ្នូ

ទិវាសិទិ្ធមនុស្សអន្តរជាតិចាប់ផ្តើម

នៅពេលអរុណរះខ្ពស់ល្មម អ្នកដើរហែក្បួនពីវត្តចាស់បានរៀបចំចេញដំណើរ។

អរុណសួរស្តី និងសូមស្វាគមន៍មកកាន់ការផ្សាយព័ត៌មានផ្ទាល់នៃទិវាសិទិ្ធមនុស្សអន្តរជាតិ។ អ្នកដើរហែក្បួនគ្រប់ផ្លូវទាំងអស់បានក្រោកពីព្រលឹម ដើម្បីរៀបចំខ្លួនត្រៀមចាប់ផ្តើមប្រារព្ធទិវា។ អ្នកដើរតាមផ្លូវជាតិលេខ ៥ បានចាកចេញពីវត្ត ឧត្តរាវត្តី ហើយ ដែលជាវត្តអ្នកទាំងនោះបានស្នាក់នៅយប់ម្សិលមិញ។ ឥឡូវនេះអ្នកទាំងនោះចាប់ផ្តើមដើរហែក្បួនហើយ។

កែប្រែ ០៧:១៤ ICT

០៧:១៣ ICT ថ្ងៃ១០ ខែធ្នូ

អ្នកដើរហែក្បួនធម្មយាត្រា-សិទិ្ធយាត្រាបានចាប់ផ្តើមដើរទៅរដ្ឋសភាជាតិ

ចុចលើផែនទីខាងលើដើម្បីពង្រួមទីតាំង។ ភាគច្រើននៃកាលវិភាគសម្រាប់ព្រឹត្តិការណ៍នាថ្ងៃនេះ ត្រូវបានបដិសេធដោយសាលារាជធានីភ្នំពេញ ហើយដូចនេះវាអាចនឹងត្រូវបានផ្លាស់ប្តូរ។។ ផែនទីខាងលើត្រូវបានធ្វើបច្ចុប្បន្នភាព ទៅតាមការផ្លាស់ប្តូរនៅក្នុងការចាកចេញនៃការដើរហែក្បួនធម្មយាត្រា-សិទិ្ធយាត្រា

អ្នកដើរហែក្បួន បានចាប់ផ្តើមចេញដើរនៅក្នុងរាជធានីភ្នំពេញ ទៅកាន់រដ្ឋសភាជាតិ។

កែប្រែ ០៧:១៥ ICT

០៧:២០ ICT ថ្ងៃ១០ ខែធ្នូ

នាឆ្នាំនេះ អ្នកចូលរួមក្នុងក្បួនធម្មយាត្រា-សិទិ្ធយាត្រា រួមមានទាំងមនុស្សវ័យចាស់ និងក្មេង។ កូននេនអាយុ ១០ឆ្នាំ ឈ្មោះ ហៃ រីម មកពីវត្តស្រះច័ន្ទ ខេត្តកំពង់ស្ពឺ ទើបតែបានបួសរយៈពេលមួយខែ។ លោកបានចូលរួមហែក្បួនតាមផ្លូវជាតិលេខ ៤។

០៨:០៩ ICT ថ្ងៃ១០ ខែធ្នូ

ជួបជាមួយអ្នកដើរហែក្បួន៖ នាង មកពីខេត្តស្ទឹងត្រែង

នាង គឺជាកសិករមកពីភូមិស្រែករ ក្នុងស្រុកសេសាន ខេត្តស្ទឹងត្រែង។ នាង គឺជាជនជាតិភាគតិចខ្មែរលើ។ ភូមិរបស់នាង ស្ថិតនៅជាប់ទន្លេសេសាន ហើយក៏នៅក្បែរទន្លេស្រែពកផងដែរ។ ជាលទ្ធផលនៃការសាងសង់ទំនប់វារីអគ្គីសនីកាត់ទន្លេស្រែពកនៅក្នុងទឹកដីប្រទេសវៀតណាម កាលពីពេលថ្មីៗនេះ ភូមិរបស់នាងបានទទួលរងគ្រោះពីទឹកជំនន់យ៉ាងធ្ងន់ធ្ងរ។ កាលពីថ្ងៃទី១ ឆ្នាំនេះ ទឹកជំនន់ បានមកដល់នៅពេលយប់ ហើយទាញយកផលដំណាំ និងអ្វីៗដែលជារបស់អ្នកភូមិទៅយ៉ាងច្រើន។

ស្ថានភាពភូមិរបស់នាង នឹងកាន់តែធ្ងន់ធ្ងរថែមទៀតនៅពេលមានការសាងសង់ទំនប់វារីអគ្គីសនី សេសានក្រោម ២ លើទន្លេសេសាន។ ភូមិរបស់នាង នឹងត្រូវរងនូវទឹកជំនន់ឆាប់ៗនេះ។ មានន័យថាអ្នកភូមិចំនួន ៦០០ នាក់នឹងត្រូររើទីលំនៅ។ នាងបានលឺថាអ្នកភូមិទាំងនោះនឹងទទួលបានសំណង ប៉ុន្តែមិនដឹងថាប៉ុន្មាននោះទេ។ ទីតាំងថ្មីដែលបានស្នើឡើង គឺមានចង្ងាយ ១២ គ.ម ពីទីនោះ ប៉ុន្តែនាងគិតថា ទីនោះ មិនមានទឹកគ្រប់គ្រាន់ដើម្បីធ្វើស្រែនោះទេ។

នាង និងបុរសមួយចំនួនទៀតក្នុងភូមិ បានចូលរួមក្នុងការដើរហែក្បួនមកកាន់រាជធានីភ្នំពេញ ដោយចាប់ផ្តើមពីខេត្តរតនគិរី។ អ្នកទាំងនោះធ្វើបែបនេះ ដោយពួកគេចង់រៀនសូត្រអំពីសិទិ្ធមនុស្ស និងយុត្តិធម៌ និងធ្វើឲ្យប្រជាពលរដ្ឋយល់ដឹងពីទំនប់វារីអគ្គីសនី សេសានក្រោម ២។ នាងនិយាយថាអ្នកភូមិមិនចង់ចាកចេញពីដីរបស់ពួកគេទេ ហើយសម្រេចចិត្តបន្តនៅទីនោះ។

ទំនប់មិនមែនសាងសង់ដើម្បីអ្នកភូមិទេ វាមិនបានផ្តល់ប្រយោជន៍ដល់អ្នកភូមិឡើយ។ ហេតុអ្វីបានជាយើងត្រូវចាកចេញ? មកពីយើងក្រីក្រ យើងគ្មានសិទិ្ធ?

សម្រាប់ព័ត៌មានបន្ថែមអំពីទំនប់វារីអគ្គីសនី សេសានក្រោម ២ សូមចុច ទីនេះ សម្រាប់ព្រឹត្តប័ត្ររៀបចំដោយអង្គការដែលមានមូលដ្ឋាននៅខេត្តរតនគិរី បណ្តាញការពារទន្លេបី។

កែប្រែ ០៨:១១ ICT

ទិវាសិទិ្ធ​មនុស្ស​អន្តរជាតិ ២០១៤

ផ្សាយ​ព័ត៌​មាន​ផ្ទាល់

ទិវាសិទិ្ធមនុស្សអន្តរជាតិ ២០១៤

ផ្សាយព័ត៌មានផ្ទាល់