ផ្សាយព័ត៌មានផ្ទាល់
កាលវិភាគនៃសវនាការនីមួយៗមានដូចខាងក្រោម៖
- ជនជាប់ចោទពីរនាក់ ដែលរួមមានទាំងអនីតិជនម្នាក់ដែលត្រូវបានចាប់ខ្លួនកាលពីថ្ងៃទី១២ ខែវិច្ឆិកា ឆ្នាំ២០១៣ អំឡុងពេលប៉ះទង្គិចគ្នាដោយហិង្សារវាងកងសន្តិសុខ កម្មករ និងប្រជាពលរដ្ឋជាច្រើន នៅក្នុងបាតុកម្មរបស់កម្មកររោងចក្រ SL កាលពីខែវិចិ្ឆកា ឆ្នាំមុន។
- ជនជាប់ចោទដប់នាក់ ដែលរួមមានមេដឹកនាំសហជីព និងសហគមន៍ និងដែលត្រូវបានចាប់ខ្លួនកាលពីថ្ងៃទី២ នៅខាងក្រៅរោងចក្រ យ៉ាក់ ជីង ក្នុងរាជធានីភ្នំពេញ អំឡុងពេលនៃការបង្ក្រាបយ៉ាងហិង្សាពីកងឆ័ត្រយោងពិសេសលេខ ៩១១ ទៅលើកម្មកររោងចក្រជាច្រើន។ ក្នុងចំណោមជនជាប់ចោទទាំងនោះ គឺមានលោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) លោក ថេង សាវឿន អ្នកសម្របសម្រួលសម្ព័ន្ធសហគមន៍កសិករកម្ពុជា (CCFC) លោក ច័ន្ធ ពុទ្ធិស័ក្ត អ្នកដឹកនាំសហគមន៍បឹងកក់ និងលោក សុគន្ធ សម្បត្តិពិសិដ្ឋ ជាបុគ្គលិកនៃមណ្ឌលសម្រាប់សិទិ្ធកម្មករកម្ពុជា (CLaRi-Cambodia)
- ជនជាប់ចោទបីនាក់ ដែលរួមមានអនីតិជនម្នាក់ ត្រូវបានចាប់ខ្លួនកាលពីព្រលឹមថ្ងៃទី៣ ខែមករា នៅក្នុងរាជធានីភ្នំពេញ តាមបណ្តោយផ្លូវវេងស្រេង បន្ទាប់ពីមានការបង្ក្រាបពីកងរាជអាវុធហត្ថ មកលើកម្មករដែលជាអ្នកតវ៉ាដោយអហិង្សា នៅខណៈដែលអ្នកទាំងនោះកំពុងរាំនៅមុខរោងចក្រ ដែលធ្វើឲ្យអ្នករស់នៅ និងកម្មករជាច្រើនតំបន់នោះ មានការខឹងសម្បាយ៉ាងខ្លាំង ហើយក៏កើតមាននូវការប៉ះទង្គិចយ៉ាងហិង្សានាយប់នោះ។
- ជនជាប់ចោទដប់នាក់ ដែលត្រូវបានចាប់ខ្លួនកាលពីថ្ងៃទី៣ ខែមករា នៅពេលដែលកងសន្តិសុខ ត្រូវបានដាក់ពង្រាយដើម្បីសំអាតផ្លូវវេងស្រេង ហើយការបោសសំអាតផ្លូវ បានធ្វើឲ្យមនុស្សយ៉ាងតិចណាស់ ៤ នាក់បានស្លាប់ និងរបួសជាច្រើននាក់ផ្សេងទៀត។
កាលពីពេលមុន នៅក្នុងករណីនៃជនជាប់ចោទពីរនាក់ ដែលត្រូវបានចាប់ខ្លួនកាលពីថ្ងៃទី១២ ខែវិច្ឆិកា អ្នកទាំងពីរ និងសាក្សីខាងព្រះរាជអាជ្ញាទាំងអស់ត្រូវបានផ្តល់សាក្ខីកម្មរួមហើយ។ នៅតែសាក្សីខាងព្រះរាជអាជ្ញា ៣នាក់ក្នុងចំនោម ១៤នាក់ប៉ុណ្ណោះ ដែលបានអះអាងថាស្គាល់ជនជាប់ចោទទាំងពីរ។ នៅក្នុងករណីនៃជនជាប់ចោទដប់នាក់ ដែលត្រូវបានចាប់ខ្លួនកាលពីថ្ងៃទី២ ខែមករា នៅក្រៅរោងចក្រ យ៉ាក់ ជីង ជនជាប់ចោទ ៤ នាក់ក្នុងចំណោម ១០នាក់ និងសាក្សីខាងព្រះរាជអាជ្ញាម្នាក់បានផ្តល់សាក្ខីកម្ម។ ករណីចំនួនពីរនៃមនុស្សទាំង ១៣នាក់ដែលត្រូវបានចាប់ខ្លួនកាលពីថ្ងៃទី៣ ខែមករា ត្រូវបានបញ្ចូលតែសវនាការមួយបន្ទប់ ហើយពេញមួយថ្ងៃ បានត្រឹមតែកំណត់អត្តសញ្ញាណសាក្សី។
អ្នកគាំទ្រជាច្រើននាក់ និងអ្នកកាសែតជាច្រើន បានព្យាយាមប្រមូលផ្តុំគ្នានៅក្រៅតុលាការ ប៉ុន្តែត្រូវបានរារាំងពីការចូលក្នុងបរិវេណតុលាការ ដោយការបិទផ្លូវរបស់អាជ្ញាធរជាច្រើនកន្លែងចាប់តាំងពីផ្នែកខាងជើងទៅផ្នែកខាងត្បូងនៃតុលាការ។
នៅថ្ងៃទី២៥ ខែមេសា ឆ្នាំ២០១៤៖ មានការបិទផ្លូវយ៉ាងធំមួយនៅជុំវិញសាលាដំបូងរាជធានីភ្នំពេញ ខាងជើងនៅជិតវត្តព្រះពុទ្ធ ហើយខាងត្បូងនៅមហាវិថីព្រះសីហនុ។ មិនដូចកាលពីពេលមុនទេ ផ្នែកនីមួយៗត្រូវបានពង្រឹងដោយមានការដាក់រថយន្តពន្លត់អគ្គីភ័យចំនួន ៣គ្រឿង។ នគរបាលធ្វើការសាកសួរអំពីអត្តសញ្ញាណ មុនពេលអនុញ្ញាតឲ្យអ្នកអង្កេតការណ៍ឆ្លងកាត់របាំងបន្លាលួស។
វេលាម៉ោង ៦ និង ១៥នាទីព្រឹកនេះ ជនជាប់ចោទបានធ្វើដំណើរពីពន្ធនាគារ ម១ មកដល់សាលាដំបូងរាជធានីភ្នំពេញហើយ។ ក្នុងរូបភាពនេះអ្នកអាចឃើញរូប លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) លោក ថេង សាវឿន អ្នកសម្របសម្រួលសម្ព័ន្ធសហគមន៍កសិករកម្ពុជា (CCFC)។
សម្រាប់ជនជាប់ចោទនីមួយៗ តុលាការអនុញ្ញាតឲ្យមានសាច់ញាតិម្នាក់ចូលក្នុងតុលាការ។ កាលពីពេលមុនមានសមាជិកក្រុមគ្រួសារជនជាប់ចោទចំនួន ២០នាក់ចូលក្នុងតុលាការ។
សំណុំរឿងទាំងបួននឹងចាប់ផ្តើមធ្វើការជំនុំជម្រះនៅក្នុងបន្ទប់សវនាការចំនួន៤ ផ្សេងពីគ្នា៖
- បន្ទប់សវនាការទី១ បុរស១០នាក់ ដែលបានចាប់ខ្លួននៅរោងចក្រ យ៉ាក ជីង កាលពីថ្ងៃទី២ ខែមករា។
- បន្ទប់សវនាការទី២ ករណីបុរសចំនួន ៣នាក់ដែលបានចាប់ខ្លួន កាលពីព្រឹកថ្ងៃទី៣ ខែមករា នៅផ្លូវវ៉េង ស្រេង និងករណីបុរសចំនួន ១០នាក់ដែលបានចាប់ខ្លួននៅផ្លូវ វ៉េង ស្រេង នៅថ្ងៃដ៏ដែលផងដែរ។
- បន្ទប់សវនាការទី៣ ករណីជនជាប់ចោទទាំង ២ ដែលត្រូវបានចាប់ខ្លួន កាលពីថ្ងៃទី១២ ខែវិច្ឆិកា ឆ្នាំ២០១៣ នៅខណ្ឌស្ទឹងមានជ័យ។
សម្រាប់ព័ត៌មានបន្ថែមអំពីជនជាប់ចោទដែលនៅក្នុងបន្ទប់សវនាការទី១ និងទី២ សូមចូលទៅកាន់ ឯកសារប្រវត្តិរូបសង្ខេប។
កែប្រែ ០៧:៥៤ ICT
អ្នកអង្កេតការណ៍ដែលមានវត្តមាននៅក្នុងបន្ទប់សវនាការរួមមានតំណាងមកពី៖
- H&M
- គណៈមេធាវីរបស់សហរដ្ឋអាមេរិក (ABA)
- ស្ថានទូតស៊ុយអ៊ែត
- កាសែតភ្នំពេញប៉ុស្តិ៍
- មជ្ឈមណ្ឌលការពារសិទ្ធិមនុស្ស (CCHR)
- ភ្នាក់ងារសហប្រត្តិបត្តិការអភិវឌ្ឍន៍អន្តរជាតិនៃប្រទេសស៊ុយអ៊ែត (SIDA)
- អង្គការ (EWMI)
- ផ្ទះសាមគ្គី
- គណៈកម្មការអ្នកច្បាប់អន្តរជាតិ (ICJ)
- សហគមអឺរ់ុប (EU)
- សម្លេងប្រជាធិបតេយ្យ (VOD)
- ទិសដៅយុត្តិធម៌
សវនាការ នឹងត្រូវចាប់ផ្តើមនាម៉ោង ៨ព្រឹក។
នៅក្នុងបន្ទប់សវនាការទី១ កៅអីទាំងអស់បានពេញ ហើយភាគច្រើនត្រូវបានសាក្សីខាងព្រះរាជអាជ្ញា និងអ្នកមកពីកងឆ័ត្រយោងលេខ ៩១១។ ជនជាប់ចោទត្រូវបានគេនាំចូលបន្ទប់សវនាការ ហើយអង្គសវនាការកំពុងចាប់ផ្តើម។
នៅក្នុងបន្ទប់សវនាការទី២ មានមនុស្សពេញ ហើយជនជាប់ចោទទាំង ១៣នាក់ បានមកដល់។ សវនាការកំពុងចាប់ផ្តើម។
នៅក្នុងបន្ទប់សវនាការទី៣ ទាំងជនជាប់ចោទ និងចៅក្រម ហើយនិងព្រះរាជអាជ្ញា បានមកដល់។
នៅក្រៅតុលាការ
អ្នកគាំទ្របានមកដល់កន្លែងបិទផ្លួវនៅខាងក្រៅតុលាការ។ រ៉ឺម៉កកង់បីមួយនេះកំពុងដឹកជញ្ជូនសម្ភារៈដែលបានរៀបចំឡើង ដោយសហគមន៍បឹងកក់។ ក្នុងចំណោមអ្នកដឹកនាំរបស់ពួកគេ លោក ចាន់ ពុទ្ធិស័ក្ក គឺជាជនជាប់ចោទម្នាក់ក្នុងបន្ទប់សវនាការ ទី១។
កែប្រែ ០៨:១៦ ICT
នៅក្នុងបន្ទប់សវនាការ
នៅក្នុងបន្ទប់សវនាការទី១ អ្នកតំណាងមកពីការិយាល័យអង្គការសហប្រជាជាតិទទួលបន្ទុកផ្នែកសិទិ្ធមនុស្ស (UNOHCHR) បានមកដល់។ អ្នកតំណាងមកពីសហគមន៍អឺរ៉ុប កំពុងត្រូវបានគេរារាំងនៅក្នុងក្រៅតុលាការ។ ចៅក្រមកំពុងណែនាំដល់សាក្សីក្នុងការផ្តល់សាក្ខីកម្ម ហើយសាក្សីខាងជនជាប់ចោទ ត្រូវបានគេប្រាប់ឲ្យរង់ចាំនៅក្រៅបន្ទប់។
នៅក្នុងបន្ទប់សវនាការទី២ ចៅក្រមកំពុងអានឈ្មោះសាក្សី។ សាក្សីខាងព្រះរាជអាជ្ញា ២២ នាក់ និងសាក្សីខាងជនជាប់ចោទ ៦នាក់ អវត្តមាន។
នៅក្នុងបន្ទប់សវនាការទី៣ មេធាវីការពារជនជាប់ចោទ កំពុងស្នើសុំការបញ្ជាំងផ្ទាំងសំពត់ស ដើម្បីបង្ហាញវីដេអូ។ ចៅក្រមមិនអនុញ្ញាតឲ្យមានការបញ្ចាំងវីដេអូទេ។
អ្នកគាំទ្របន្តធ្វើដំណើរមកកាន់តុលាការ
អ្នកគាំទ្រដែលធ្វើការជួបជុំគ្នាខាងក្រៅតុលាការដើម្បីគាំទ្រជនជាប់ចោទ គឺជាអ្នកតំណាងមកពីសហគមន៍បុរីកីឡា និងសហគមន៍បឹងកក់ ព្រះសង្ឃ ក្រុមគ្រួសារជនជាប់ចោទ ប្រហែលជា ១០០នាក់នៅផ្នែកខាងត្បូងរបាំងបិទផ្លូវ និងប្រហែលជា ៣០នាក់នៅផ្នែកខាងជើងរបាំងបិទផ្លូវ។ អ្នកកាសែត និងអ្នកឃ្លាំមើលសិទ្ធិមនុស្សក៏មានវត្តមាននៅទីនោះផងដែរ។
កែប្រែ ០៨:៣៥ ICT
នៅក្នុងបន្ទប់សវនាការទី៣ ចៅក្រមជាចុងក្រោយ មិនអនុញ្ញាតឲ្យមានការចាក់បញ្ចាំងវីដេអូដែលជាភស្តុតាងនោះទេ ហើយបានបន្តនីតិវិធីទៅមុខរហូតដល់ការធ្វើសេចក្តីសន្និដ្នានចុងក្រោយ។ ព្រះរាជអាជ្ញាកំពុងសរុបឡើងវិញនូវករណីរបស់ជនជាប់ចោទទាំងអស់។
កែប្រែ ០៨:៣៦ ICT
នៅក្នុងបន្ទប់សវនាការទី២ ជនជាប់ចោទឈ្មោះ ជា សារ៉ាត់ ដែលជាអ្នករត់ម៉ូតូឌុប កំពុងផ្តល់សក្ខីកម្ម។ ចៅក្រមបានសួរទៅលោក ថាតើហេតុអ្វីបានជាលោកកាន់ដបសាំង ហើយលោកបានឆ្លើយតបទៅវិញថា ដើម្បីចាក់ម៉ូតូរបស់លោក។ លោកបាននិយាយថា លោកនៅពេលនោះកំពុងឈរមើលព្រឹត្តិការណ៍នោះ តែមិនបានចូលរួមនោះទេ។
កែប្រែ ០៨:៤៧ ICT
សូមស្វាគមន៍មកកាន់មជ្ឈមណ្ឌលផ្សាយ ព័ត៌មានអំពីព្រឹត្តិការណ៍នយោបាយ និងសិទិ្ធមនុស្សសំខាន់ៗ នៅក្នុងប្រទេសកម្ពុជា របស់យើងខ្ញុំ ។
នៅខណៈដែលស្ថានភាពត្រូវបានបង្ហាញ យើងនឹងផ្តល់នូវព័ត៌មានទាន់ហេតុការណ៍ពីទីតាំងផ្ទាល់ ពីអ្នកឃ្លាំមើលរបស់យើងខ្ញុំ និងប្រភពព័ត៌មានដែលអាចជឿទុកចិត្តបានដទៃទៀត ដូចជាអ្នកកាសែត និងដៃគូអង្គការមិនមែនរដ្ឋាភិបាលនានា។
LICADHO Website
Facebook
Twitter